• Vulvodinia i referohet dhimbjes në zonën e vulvës dhe vaginës për të cilën nuk është identifikuar ndonjë shkak.
• Vulvodinia nuk lidhet me sëmundjet e transmetueshme seksualisht.
• Shkaku i saktë i vulvodinias nuk njihet.
• Simptomat përfshijnë djegie, pulsim ose dhimbje që mund të lokalizohet në një zonë të vulvës ose më e përhapur.
• E kruara vaginale mund të shoqërohet me vulvodinia.
• Vulvodinia mund të trajtohet me medikamente dhe/ose me masa të kujdesit për veten.
• Nuk ka ndonjë trajtim që të jetë i efektshëm për të gjithë gratë.
• Anestezikët lokalë, kremrat estrogjene me përdorim lokal, ilaçet kundër depresionit dhe ato antikonvulsive janë shembuj të trajtimit mjekësor të vulvodinias.
• Teknika e kontrollit psikologjik, ushtrimet fizike dhe bllokuesit nervorë mund të jenë të dobishëm.
• Vulvodinia nuk shoqërohet me kancerin apo sëmundje të tjera serioze, por mund të jetë burim i një shqetësimi fizik dhe emocional afatgjatë.

Çfarë janë dhimbja vaginale dhe vulvodinia?

Vulvodinia i referohet dhimbjes në zonën e vulvës dhe hapjes vaginale. Ajo konsiderohet se është dhimbje për të cilën nuk ka shkak të njohur. Ajo është e ndryshme nga dhimbja e lokalizuar thellë në komblik apo brenda në vaginë. Ky artikull përqendrohet tek dhimbja në zonën e vulvës dhe në hapjen e vaginës. Ajo mund të jetë kronike dhe mund të zgjasë me vite tek disa gra. Shkalla e ashpërsisë ndryshon tek gra të ndryshme. Shpesh ndodh në mungesë të shenjave fizike ose çrregullimeve të dukshme. Mund të jetë e rëndë dhe mund të ndikojë në aktivitetin seksual dhe të shkaktojë marrëdhënie të dhimbshme (dispaureni).

Çfarë e shkakton dhimbjen vaginale dhe vulvodinian?

Është e paqartë përse disa gra kanë vulvodinia. Nuk mendohet të jetë e lidhur me sëmundje të transmetueshme seksualisht. Disa teori sugjerojnë që mund të lidhet me dëmtimin apo acarimin e nervave, reagime anormale ndaj acarimit apo inflamacion-it, reaksione alergjike, spazma muskulore, një histori të abuzimit seksual ose përdorim të shpejtë të antibiotikëve. Faktorët familjarë apo gjenetikë janë sugjeruar edhe ata që luajnë një rol në shfaqjen e sëmundjes. Fatkeqësisht, shkaku i saktë nuk është përcaktuar.

Çfarë simptomash janë karakteristike për dhimbjen vaginale dhe vulvodinian?

Simptomat e vulvodinias përfshijnë dhimbjen që mund të perceptohet si djegie apo pickim. Dhimbja mund të jetë konstante apo të kalojë shpejt. Mund të ndodhë gjatë aktiviteteve të ndryshme si seksi apo ushtrimet fizike. Gjithashtu mund të shfaqet edhe në gjendje qetësie. Disa gra raportojnë një dhimbje që lokalizohet në njërën anë apo në një zonë të vulvës, ndërsa të tjera kanë një dhimbje më të përgjithshme dhe të përhapur. Zakonisht nuk ka shenja apo ndryshime fizike që e shoqërojnë, por disa herë ka prova të një lëkure të inflamuar.

Cilët janë faktorët e riskut për dhimbjen vaginale dhe vulvodinian?

Meqenëse shkaku nuk kuptohet mirë, është e vështirë që të parashikohet kush është në rrezik për vulvodinia. Ajo mund të prekë gra të të gjithë moshave dhe racave. Ajo mund të fillojë herët në adoleshencë dhe para ose pas menopauzë-s.

Cilat teste diagnostike përdoren për të vlerësuar dhimbjen vaginale dhe vulvodinian?

Nuk ka teste specifike që e konfirmojnë vulvodinia-n dhe diagnostikimi bëhet bazuar mbi simptoma karakteristike. Megjithatë, meqenëse infeksionet e vulvës dhe ato vaginale shoqërohen ndonjëherë me djegie dhe të kruara, marrja e kulturave ose teste të tjera diagnostikuese mund të bëhen për të përjashtuar këto infeksione.

Si trajtohen dhimbja vaginale dhe vulvodinia?

Vulvodinia mund të menaxhohet edhe me trajtime mjekësore edhe me kujdesin vetjak. Jo të gjitha trajtimet do të jenë të efektshme për çdo grua dhe një gruaje mund t’i duhet të provojë trajtime të ndryshme për të gjetur alternativën më të mirë për të.

Medikamentet dhe terapi të tjera mjekësore

Disa nga medikamentet që kanë qenë të dobishme përfshijnë:

• Kremrat estrogjene për përdorim lokal;
• Anestezikët lokalë;
• Ilaçet triciklikë kundër depresionit;
• Antikonvulsantët ndonjëherë janë të dobishëm në menaxhimin e dhimbjes kronike.

Terapi të tjera për gratë me vulvodini të rëndë janë injeksionet e interferonit ose bllokuesve nervorë në të cilët injektohen medikamente për të reduktuar sinjalet nga nervat në zonën e prekur. Trajtimi psikologjik dhe ushtrimet për fundin e komblikut kanë qenë të dobishme për disa gra. Së fundmi, largimi me anë të ndërhyrjes kirurgjikale të indit të prekur mund të ndihmojë tek gratë me vulvodini.

Mjekime shtëpiake për dhimbjen vaginale dhe vulvodinian

Mjekimet shtëpiake dhe masat për kujdesin vetjak për vulvodinia-n mund të sjellin qetësim të saj për shumë gra. Disa masa të kujdesit vetjak për qetësimin e dhimbjeve janë:

• Shpëlarja e zonës me ujë të ftohtë, veçanërisht pas urinimit ose aktivitetit seksual.
• Zhytje në banja të freskëta ose të ngrohta.
• Përdorim i pakove të akullit të mbështjella me një peshqir.
• Përdorim i jastëkëve ngrohës mund të ndihmojë disa gra.
• Përdorimi i sapunëve të butë pa aroma.
• Përdorimi i letrave të bardha higjienike pa aroma.
• Përdorimi i të brendshmeve të bardha prej pambuku.
• Veshja e rrobave të lirshme dhe shmangia e çorapeve dhe getave.
• Shmangia nga pishinat ose vaskat me ujë të klorinuar.
• Përdorimi i lubrifikuesve të tretshëm në ujë gjatë marrëdhënieve seksuale.
• Shmangia e udhëtimit me biçikleta. Ato ushtrojnë presion në zonën e vulvës.
• Mbajtja e zonës së vulvës të pastër e të thatë.
• Shmangia e ushqimeve që mund ta bëjnë urinën më acaruese të lëkurës në zonën gjenitale.
• Antihistaminat mund të ndihmojnë të reduktohen të kruarat, veçanërisht natën.

Cilat janë komplikimet e dhimbjes vaginale dhe vulvodinias?

Dhimbja e vulvodinia-s mund të jetë dobësuese dhe të ndërhyjë në aktivitetet e përditshme dhe marrëdhënien seksuale. Ajo mund ta bëjë gruan të ndjejë një humbje të kontrollit mbi trupin e saj duke shkaktuar një bezdi emocionale dhe fizike.

Cila është prognoza për dhimbjen vaginale dhe vulvodinian?

Vulvodinia është një sëmundje kronike, në kuptimin që mund të rezistojë nga muaj deri në vite. Në disa gra ajo mund të vijë e të shkojë. Ndërsa nuk shoqërohet me kancerin ose me ndonjë sëmundje tjetër serioze, ajo mund të jetë një burim i dhimbjeve kronike dhe bezdie emocionale.