Dihet se njerëzit me lëkurë me ngjyrë të bardhë kanë më shumë rrezik ndaj djegies nga dielli, por njerëzit nuk e kuptojnë që lëkura e çfarëdolloj ngjyre mund të dëmtohet nga rrezet e diellit. Djegia nga dielli nënkupton djegien e lëkurës, megjithëse ajo ndodh më ngadalë se djegiet e tjera të lëkurës. Nëse lëkura është skuqur dhe gjithashtu ndihet e ngrohtë në prekje ajo mund të trajtohet në shtëpi.

Megjithatë, lëkura krijon flluska ose ënjtje me dhimbje të konsiderueshme dhe kjo është vlerësuar djegie e shkalles së parë dhe mund të ketë nevojë për trajtime mjekësore. Kujdesja që do të merret në këtë rast është edhe për shkak se djegia nga dielli është e shoqëruar nga temperatura, përzierja dhe dehidratim.

Djegia nga diell, kur është e mundur, duhet shmangur pasi ajo mund të dëmtojë lëkurën duke shkaktuar plakjen e parakohshme. Djegia e fortë nga dielli rrit rrezikun e zhvillimit të kancerave të lëkurës në vitet e mëvonshme.

Djegia nga dielli shkaktohet nga komponentët ultraviolet të rrezeve të diellit, veçanërisht nga komponenti UVB. Intensiteti i rrezeve UVB është më i lartë në orët e mesditës (midis orës 10 të mëngjesit dhe 14-15 të drekës), kështu që shmangia e diellit gjatë kësaj kohe është shumë e rëndësishme.

Dielli nuk është burimi i vetëm i djegies: është e rrezikshme që të merret një djegie e fortë edhe nga solaret. Në fakt solaret mund të kenë një përqendrim më të lartë të rrezeve ultraviolet sesa dielli, dhe ekspozimi UV nga solaret mund të shkaktojë plakjen e parakohshme të lëkurës, ashtu sikundër kancerin e lëkurës dhe dëmtimin e syve. Ekspozimi i rrezeve UV nga përdorimi i solareve, rrit në mënyrë sinjifikative rrezikun e melanomës. Përdorimi i tyre nuk është i rekomandueshëm.

Një sërë ilaçesh, siç është antibiotiku tetraciklinë, mund të rrisë efektin nga djegia e diellit.

Cilat janë simptomat?

• Çngjyrosja e lëkurës nga pak e kuqe në shumë të kuqe. Djegia nga dielli mund të shfaqet nga 1 deri në 6 orë pas ekspozimit në diell dhe arrin kulmin e saj në 24 orë. Më pas do të fillojë të nxihet ose të kthehet në të kafenjtë;
• Lëkura ndihet e ngrohtë në prekje dhe është e ndjeshme;
• Shfaqja e flluskave që janë të mbushura me lëng. Ato mund t’ju shkaktojnë kruarje;
• Djegia shumë e rëndë e lëkurës mund të shkakojë një skuqje shumë të madhe dhe mund të shoqërohet me temperaturë, përzierje (në disa raste vjellje) dhe dehidratim;
• Sytë mund të përjetojnë dhimbje ose irritim, e shkaktuar kjo nga ekspozimi i tepërt i rrezeve UV të diellit (gjithmonë vendosni syze kur jeni jashtë).

Trajtimi i djegies nga dielli

Jo të gjitha rastet e djegieve nga dielli mund të kërkojnë kujdesjen mjekësore dhe janë shumë gjëra që mund të bëni për të ndihmuar në trajtimin e djegies nga dielli.

• Vendosni kompresa të ftohta ose vendosni zonën e prekur në ujë të ftohtë;
• Locioni i Calamine mund të vendoset në zonat e kruajtshme. Kjo nuk mund të jetë e përshtatshme nëse lëkura juaj është e thatë–një locion vajor i Calamine mund të jetë një alternativë. Pyesni për këshillë farmacistin ose mjekun;
• Vendosni krem ose locion në zonën e prekur;
• Pini sa më shumë ujë, por shmangni alkoolin pasi mund të dehidratojë edhe më shumë lëkurën;
• Nëse ndodh prania e flluskave, mbulojeni lehtë me një garzë. Në këtë mënyrë parandaloni infeksionin. Mos i shtypni flluskat pasi mund të rrisin rrezikun e infeksionit;
• Në rastet e djegieve të rënda ose të parehatisë, aspirina (por jo për fëmijët nën moshën 12 vjeçare), paracetamoli ose liruesit e dhimbjeve siç është ibuprofeni mund të përdoren.

Kur duhet të shkoni tek mjeku?

Shkoni tek mjeku:

• Nëse djegia nga dielli është përhapur dhe është e fortë;
• Nëse djegia nga dielli prek një të mitur nën moshën 18 muajsh;
• Nëse flluskat e djegies nga dielli janë të shoqëruara me djegie ,temperaturë, përzierje ose të vjella. Kujdesi mjekësor është i nevojshëm për të parandaluar dehidratimin dhe infeksionin;
• Nëse sytë dhëmbin shumë, duhet të bëni kontoll tek mjeku i syve për të përcaktuar ndonjë dëmtim të mundshëm.