Ankthi është pjesë normale e jetës. Shumë njerëz ndihen në ankth kur përballen me një kërcënim ose me një sfidë të re. Një ekzaminim, një intervistë pune ose një konkurs i rëndësishëm, mund të jenë prodhues normal i ankthit. Në të vërtetë, ankthi në këto situata është ndihmues. Por, ndërkohë që shumë pak ankth mund të na bëjë që të ndihemi të vetëkënaqur, shumë ankth mund ta bëjë jetën shumë të vështirë.

Ankthi ndikon tek ne në mënyra të ndryshme. Mentalisht, mund të na bëjë që ne të ndihemi të shqetësuar, të ndikojë në vëmendjen dhe përqendrimin tonë dhe të shkaktojë paragjykime në mënyrën sesi ne mendojmë, duke na bërë që ta shohim botën si një vend më të frikshëm sesa është në të vërtetë.

Ankthi gjithashtu prodhon një sërë efektesh anësore, siç është pulsi i shpejtë, marramendje, dridhje, shqetësime me tretjen e ushqimeve, djersitje dhe një tendencë për të marrë frymë shumë shpejt, hiperventilim etj. Kjo shpesh çon në pagjumësi.

Ankthi ndikon edhe në sjelljen tonë, duke na bërë që të shmangim situata që ne mendojmë se mund të na shkaktojnë ankth.

Gjendjet e klasifikuara si çrregullime të ankthit

• Çrregullimi panik: Kjo prodhon episode të papritura në mënyrë të përsëritur të ankthit dhe frikës së vazhdueshme, shpesh pa një shkak të dukshëm. Çrregullimi i ankthit mund të jetë i përzier me agorafobinë, në të cilën personi i prekur do të shmangë vendet publike dhe zhurmat, nga frika e të përjetuarit të një ataku paniku;
• Fobia: Këto janë frikëra të vazhdueshme, irracionale. Fobitë specifike zakonisht përfshijnë frikën nga kafshët (p.sh. merimangat, qentë); mjediset natyrore (p.sh. lartësitë, stuhitë); procedurat mjekësore (p.sh. gjilpërat, operacionet); ose situatat siç janë udhëtimet me avion ose të qenit në një ambient të mbyllur. Ekspozimi ndaj fobive, shkakton ankthekstrem;
• Fobia sociale: Kjo është një formë ekstreme e ndrojtjes, e karakterizuar me një frikë të vazhdueshme nga gjykimet negative të të tjerëve. Kjo mund të kufizohet nga ankthi i vazhdueshëm rreth të folurit në publik ose mund të përfshijë të gjitha situatat, ku njerëzit ndihen “në ekran”, siç janë festat ose tubimet e tjera sociale;