Njerëzit e moshuar mund të jenë veçanërisht pre e depresionit, për shkak të përjetimit të një sërë ngjarjesh stresuese. Megjithatë, depresioni nuk është një pjesë normale e plakjes.

Faktorët rrezikues

Faktorët e rrezikut për depresionin në moshën e vonë (65 vjeç e më shumë) përfshijnë:

• Sëmundjet fizike (veçanërisht sëmundjet afatgjata, sëmundjet që prekin sistemin nervor, sëmundjet e zemrës dhe ato sëmundje që janë të lidhura me paaftësi të përhershme);
• Izolimin;
• Dhimbjet kronike; dhe
• Humbjen e të afërmve.

Shenjat e depresionit

Depresioni mund të mos njihet në plakje, pasi shpesh neglizhohet nga familjarët, miqtë e mjekët si dhe i atribuohet ndryshimeve të moshës (demencës dhe sëmundjeve të tjera).

Shenjat e depresionit, që në pjesën më të madhe të rasteve keqinterpretohen nga të moshuarit janë:

• Humbja e interesit për jetën;
• Mungesa e argëtimit ndaj aktiviteteve normale;
• Të ndjerit që jeta ka mbaruar, që nuk ka mbetur më asgjë për tu shijuar;
• Ndjenja e ankthit;
• Mungesa e energjisë dhe entuziazmit;
• Pagjumësia;
• Vështirësitë në përqendrim ose në kujtesë;
• Mungesa e oreksit;
• Ndryshimet e sjelljes, siç është p.sh. refuzimi i të ngrënit;
• Dhimbja kronike e pashpjegueshme ose simptomat fizike, siç janë: kapsllëku ose humbja e peshës;
• Tërheqja shoqërore (tërheqja nga familja dhe miqtë); dhe
• Mungesa e higjienës personale.

Pasojat e mostrajtimit të depresionit

Është e rëndësishme që depresioni të identifikohet dhe të trajtohet, pasi sëmundja mund të ketë pasoja për individët që e lënë të patrajtuar. Përveç vuajtjeve të lidhura me mostrajtimin e depresionit, gjendja mundet gjithashtu që të ketë një ndikim negativ në shëndetin fizik, marrëdhëniet dhe aftësitë për të jetuar në mënyrë të pavarur.

Në raste ekstreme, depresioni tek njerëzit e moshuar është i lidhur me një rritje rreziku për vetëvrasje ose tentativë për vetëvrasje.

Trajtimi i depresionit

Në përgjithësi, trajtimi për depresionin tek të moshuarit është i njëjtë me atë të të rinjve dhe përfshin një kombinim të ndryshimeve të jetesës, këshillimin dhe mjekimet antidepresive. Zgjedhjet e trajtimeve do të ndryshojnë, në varësi të natyrës dhe ashpërsisë së depresionit dhe faktorëve të tjerë, siç është shëndeti fizik i personit.

Depresioni i lidhur me ngjarjet stresuese të jetës, mund të gjejë zgjidhje tek trajtimet psikologjike dhe këshillimit. Depresioni me origjinë biologjike mund të kërkojë trajtim me ilaçe dhe trajtim fizik.

Antidepresantët e rinj të quajtur SSRI, janë shfaqur për efektet më të pakta anësore në krahasim me antidepresantët e vjetër, por ato shkaktojnë dhimbje koke, përzierje dhe përgjumje.

Terapitë komplementare dhe alternative që mund të jenë të domosdoshme mund të jenë të nevojshme për depresionin e butë, jobiologjik dhe përfshijnë relaksimin dhe të ushtruarit.

Zakonisht, ekziston një shkak, që ndikon në kthimin e depresionit, siç është përdorimi i ilaçeve që merren për një gjendje tjetër.

Parandalimi i depresionit

Dëshmitë janë në rritje dhe tregojnë se zhvillimi i depresionit, mund të jetë i lidhur me sëmundjen vaskulare. Si rrjedhojë, eliminimi i faktorëve të rrezikut të sëmundjes vaskulare, si lënia e duhanit dhe trajtimi i sigurt i presionit të lartë të gjakut dhe nivelet e larta të kolesterolit, mund të reduktojnë rrezikun e zhvillimit të depresionit.

Rreziku i zhvillimit të depresionit, mund të reduktohet duke u ushtruar rregullisht, duke mbajtur mendjen tuaj aktive dhe duke marrë pjesë në aktivitete sociale. Masa të tjera të rëndësishme që kërkohen, përfshijnë kontrollin e dhimbjes kronike dhe këshillimin pas humbjes së një personi të dashur.